First Love

by James Earn Ablaza Esperida on Wednesday, February 2, 2011 at 12:28pm

KABANATA I

(Sa loob ng klasrum – Grade I)

Habang nagleleksyon si Ginang Amy Amier.. .

Makisig: (Magkahawak ang kamay nila ni Maganda. Natatakpan lang ng bag ni Makisig ang mga kamay na pinagdadaluyan ng tibok ng kanilang mga puso.) Mahal mo ba talaga ako?

(Mahina niyang ibinulong.)

Maganda: (Nagkukunwaring nakikinig sa guro. At pabulong na ibibigkas ang sagot.) Oo naman, ikaw lang ang mahal ko.

Maglalakad-lakad ang titser, maglilibot-libot.

Makisig: (Bibitawan ni Makisig ang kamay ni Maganda. Marahan, parang hindi sumasang-ayon. At pabulong ding ipagpapaubaya sa hangin ang mga kataga na siyang magdadala patungo sa puso ng kanyang sinisinta.) Doon ulit tayo sa ating tagpuan mamayang recess.

At tumunog na ang bell.

KABANATA II

(Sa likod ng silid-aralan)

Parang iba ang pakiramdam ni Maganda ng umagang iyon, may nalaman siyang balita. Parang iba ang kanyang kinikilos, parang may iba.

Maganda: Pano yan? May gusto pala saiyo si Mahinhin?

Makisig: Paano naman nangyari yun? Siya lang naman ang tumulong sa akin para mapalapit sayo.

Maganda: Ah basta, sabi niya sa akin, may gusto daw siya saiyo.

KABANATA III

(Sa likod ulit ng silid-aralan)

Makisig: Totoo ba ang sinabi sa akin ni Maganda, na may gusto ka raw sa akin?

Mahinhin: Sinabi nya sa’yo yun?

Makisig: Oo, pero mahal ko si Maganda at siya lang ang paka iibigin ko.

Tumakbo si Mahinhin, may luha sa kanyang mga mata.

KABANATA IV

(Sa likod ulit ng silid-aralan)

Makisig: Lagot, nakita tayo ni titser na magka-holding hands kanina.

Maganda: Ikaw naman kasi ‘di mo tinakpan ng bag.

KABANATA V

(Sa silid-aralan)

Tatay ni Makisig: (Kakausapin ang guro.) Ma’am, ayaw ko na po sanang papasukin ‘tong si Makisig dahil ang taas ng lagnat niya, kasu nagpipilit pa rin pong pumasok. Ayaw daw niyang mag-absent.

Ginang Amier: Makisig, ayos lang naman sa akin na magliban ka muna ngayon. Mag-rereview lang naman kami ngayong araw kaya hindi ka naman makaka-skip ng lesson ngayon.

Makisig: (Hindi kumikibo. Parang naka-glue ang kanyang mga paa sa sahig na kanyang kinatatayuan.)

Ginang Amier: Sige na nga po, papapasukin ko na si Makisig, pero kapag hindi na niya po kaya, magsabi lang siya.

Tatay ni Makisig: (Unulit kay Makisig ang sinabi ni Ginang Amier.) Oh, sige na. Pumasok ka na. Dito lang ako sa labas maghihintay. Sabi ni titser mo, kapag hindi mo na kaya, magsabi ka lang para umuwi na tayo.

Parang maglulundag si Makisig sa tuwa. Umepek ang kanyang power.

KABANATA VI

(Sa silid-aralan)

Maganda: Giniginaw ka na Makisig.

Makisig: Hiiiinnnndiiii….

Maganda: Umuwi ka na muna, magpahinga ka para gumaling ka kaagad.

Makisig: MMmmmaaaaggg-uuuusaaappp ppppaaa nggga tayyyooo mammmmayyya eeehh.

Hindi na nakayanan ni Makisig ang kanyang lagnat. Siya na mismo ang nagsabi sa kanyang Tatay na uuwi na siya.

KABANATA VII

(Sa likod ng silid-aralan)

Makisig: (Ibibigay ang bulaklak ng gumamela na nakatanim sa likod ng kanilang silid-aralan.) Mahal mo ba talaga ako Maganda?

Maganda: Di ba nga sabi ko, oo. Hindi ako papayag na agawin ka ni Mahinhin sa akin.

Tumunog na ang bell. Tapos na ang recess. Nag-iwan siya ng halik.

KABANATA VIII

(Sa bintana ng silid-aralan ng Grade II-C)

Makisig: Paano yan? Magkaiba na ang section natin ngayon. Magkalayo na tayo. Hindi ko na mahahawakan pa ang mga kamay mo.

Maganda: Ok lang yan, Makisig. Mag-uusap pa naman tayo tuwing recess.

Tumunog na ulit ang bell.

KABANATA IX

(Sa likod ng room ng Grade II-C)

Makisig: Mukhang napapadalas na ang ating pag-uusap. Malapit na ang bakasyon, hindi na naman tayo magkikita.

Maganda: (Nakikinig lamang kay Makisig habang nakatitig ito sa kanyang mga mata.)

Tumunog na ulit ang bell.

KABANATA X

(Sa silid-aralan ng Grade III, unang araw ng pasukan)

Makisig: (Sumisigaw sa tuwa ang kanyang isip.) Yes! Isa lang ang section ng Grade III, makakatabi ko ulit si Maganda.

Inilibot niya ang kanyang mga mata, ngunit wala ang magandang mukha ng kanyang sinisinta.

Makisig: (Kakausapin si Mahinhin na pinsan ni Maganda.) Bakit wala si Maganda?

Mahinhin: (Ipaliliwanag kay Makisig.) Lumipat na siya sa Maynila. Doon na siya magpapatuloy na kanyang pag-aaral. Doon na daw kasi sila titira.

Parang gumuho ang mundo ni Makisig, nagtatakbo siya papunta sa dati nilang tagpuan.

KABANATA XI

(Sa room ng Grade VI)

Makisig: Umuwi na ba ng Bicol si Maganda?

Mahinhin: Hindi pa rin.

Makisig: Kailan sila uuwi dito.

Mahinhin: (Walang binitawang kataga.)

KABANATA XII

(Sa College Library)

Makisig: Ano ba ‘to? Kanina ko pa hinahanap ang kanyang pangalan pero di ko parin matagpuan.

Nanlalaki ang kanyang mga mata nang makita nya sa search panel ng Friendster ang nag-iisang pangalan ni Maganda.

Naroon ang ilan sa impormasyon tungkol sa kaniya. Parang gusto na agad niyang maniwalang ang babaeng iyon ang matagal na niyang hinahanap. Nagpadala siya ng Friend request. Nag-iwan din siya ng mensahe na nagtatanong kung siya nga ba mismo ang hinahanap niya.

Muli niyang binalikan ang kanyang Friendster Account. Wala paring kumpirmasyong na tinangggap na ni o ng kapangalan ni Maganda ang kanyang sulat-troniko.

Walang bakas ng pagbisita nito sa kanyang FS account. Halatang hindi nagalaw ang kanyang profile.

Huminga na lang siya ng malalim.