KABANATA I
(Linggo, sa Medroso Park)
Kasabay ng pagtugtog ng kampana, nagsilabasan na rin ang mga tao sa simbahan. Tapos na ang misa. At katulad ng dati, mas puno pa rin ang Medroso Park.
Naglakad-lakad sina Makisig at ang kanyang kaibigang si Masaya. Inanod sila ng siksikan sa gitna ng parke. Doon, malapit sa pinagitnang ilaw ay naalinigan nila ang dalawang dalaga.
Lumapit sila sa kinaroroonan ng dalawang kamag-aral ni Masaya, sina Maligaya at Makiling.
Masaya: (Ipakikilala si Makisig sa dalawa) Siya nga pala, si Makisig, kaibigan ko.
Makisig: (Hindi makapagsalita, nakatitig kay Maligaya. At nag-isip) Hanep 'to. Ang ganda.
Masaya: (Ipakikilala ang dalawang kamag-aral) Sina Maligaya at Makiling.
Makisig: (Makikipagkamay. Una kay Maligaya, sumunod kay Magiliw.) Hi!
KABANATA II
(Pauwi na sina Makisig at Masaya)
Masaya: (Nangungutya) Parang tinamaan ka kay Maligaya, ano?
Makisig: (Hindi umiimik.)
Masaya: Sorry ka na lang, may syota na 'yun.
Makisig: (Iiling) Ganoon ba, sayang.
KABANATA III
(Sa bahay ni Makisig)
Pumunta sa bahay ni Makisig si Masaya. Doon kasi ito madalas tumatambay.
Masaya: (Tatawa-tawa) Ang galing mo Makisig.
Makisig: Bakit naman?
Masaya: Type ka daw ni Makiling.
Makisig: Sinong Makiling?
Masaya: Hindi mo ba natatandaan? Iyong kasama ni Maligaya na nakilala natin sa Park.
Makisig: Iyon ba. Hindi naman siya ang type ko. Ang gusto ko, si Maligaya. Bakit? Ano daw ang sabi?
Masaya: Tinanong ako kung may syota ka na raw. Sabi ko, wala.
Makisig: Tapos...
Masaya: Sabi niya, kung pwede ka raw niyang maging syota.
Makisig: Ganoon ba? Sabihin mo, available. (Tatawa.)
KABANATA IV
(Sa bahay ni Makisig)
Tumunog ang cell phone ni Makisig. Gaya ng kanyang inaasahan, may text galing kay Makiling. Nang araw ding iyon, nagkakilala silang dalawa.
Nahulog na rin ang loob ni Makisig kay Makiling ngunit hindi pa rin nawawala ang kanyang nararamdaman kay Maligaya.
KABANATA V
(Sa Sto. Niño, Quipayo)
Napapadalas na ang tambay ni Makisig sa Quipayo. Meron siyang takot na baka siya'y mapagtripan sa lugar na iyon. Ngunit, daig parin ito ng kanyang kagustuhang makita ang nililigawan. Bagamat hindi niya alam kung sino ba talaga ang gusto niyang makita, si Maligaya kahit may kasama itong iba, o si Makiling na natututunan na rin niyang mahalin.
Wala ng araw na hindi siya pumupunta sa Quipayo. Karamihan sa mga tambay doon ay nag-aral din sa kanyang pinasukang paaralan. Doon niya rin muling nakita ang naging mga kaklase niya sa isang summer class noong siya'y nasa elementarya. Dahil dito, naramdaman niyang secured siya sa lugar na iyon.
Kabarkada 1: (Iaabot ang basong tagayan) Parang nahahalata kong lagi ka na rito sa amin ha!
Kabarkada 2: Hindi mo ba alam, manliligaw yan ni Makiling.
Kabarkada 3: Ganoon ba, 'wag kang mag-ala-ala, walang mangyayari dito saiyo. Safe ka dito.
Makisig: (Di makaimik habang pinagmamasdan si Maligaya. Itutungga ang tagay.)
KABANATA VI
(Sa bahay ni Makisig)
Parang gusto niyang magsisigaw nang siya ay umuwi sa kanilang bahay. Lahat na lang ng taong nakakasalamuha niya ay masaya. Pati ang stuff toy na Pooh ay pakiramdam niya'y nakangiti na rin sa kanya. Parang nagdidiriwang ng kasiyahan ang buong mundo.
Makisig: (Kausap si Masaya) Sinagot na ako ni Makiling. Ngunit, love contract lang. Ayos na ayos yun sa akin. Hindi naman ako seryoso sa kaniya.
Masaya: Ano ba 'yang love contract na sinasabi mo?
Makisig: Nagkasundo kami na maging love contract ang aming relasyon. 'Yun bang pagkatapos na isang buwan, kapag hindi nagwork ang relationship namin, pwedeng hindi na namin i-renew ang aming love contract.
Masaya: Astig ha!
KABANATA VII
(Sa Sto. Niño, Quipayo ulit)
Mukhang naiimpluwensyahan na rin si Makisig ng kanyang mga barkada. Natatangkilik na rin niya ang maging RASTA. Mahilig na din siyang magsuot ng may tatlong kulay ng RASTA, ang berde, dilaw at pula.
Makisig: Ano kaya kung magpa-tongue pierce na rin ako?
Masaya: Subukan mo lang daw gawin iyan, ibe-break ka ni Makiling.
KABANATA VIII
(Sa NCF)
Masyadong naging abala si Makisig sa kanyang pag-aaral. Bagamat tambay siya, hindi niya pa rin pinapabayaan ang kanyang pag-aaral.
Sulatan muna sila ni Makiling. Minsan na lamang siyang pumunta sa Quipayo, o kung pumupunta man siya doon ay maaga lang siya kung umuwi.
KABANATA IX
(Sa Octagon, JS Prom nina Makiling)
Araw ng mga puso. Ito rin ang huling gabi ng puso Makisig kay Makiling.
Marami na ang gawain sa School publication. Malapit na rin ang Final kung kayat marami na namang gawain si Makisig, projects, researches at kung anu-ano pa. Wala naman siyang dapat ikabahala, tutal love contract lang naman sila ni Makiling. Hinihintay na lang niyang dumating ang kanilang 19 ng susunod na buwan upang sila'y makapagdesisyon kung renew o tapos.
Halos nagsisimula na ang JS Prom Night ng dumating si Makisig sa Octagon. Doon kasi ginanap ang nasabing pagdiriwang dahil sa masama ang panahon.
Nang gabi ding iyon, nakita niya si Makiling sa kanyang mala-dyosang suot. Naka-puti.
Nag-usap sila. Ngunit panandalian lamang dahil may exam pa si Makisig kinabukasan. Nagpaalam siya at ibinigay ang Valentine Card at bulaklak bilang simbulo ng kanyang simpleng pag-ibig dito.
KABANATA X
(Sa bahay ni Makisig)
Dumating na ang araw na marahil ay hinihintay nilang dalawa sa tinagal ng isang buwan. Ang araw ng pagtatapos ng lahat ng kanilang mga kahibangan sa buhay pag-ibig.
Hawak-hawak ni Makisig ang kanyang cell phone. Parang gusto niyang si Makiling na mismo ang unang mag-text sa kanya. At siya na lang ang magkukumpirma ng kanilang paghihiwalay.
Hanggang inabot ng gabi ay wala pa rin ni isang text mula kay Makiling.
Makisig: (Patingin-tingin sa kanyang cellphone. Hindi makakatiis. Susubok ng i-text si Makiling.)
Hi! Musta na?
(Mga ilang minuto bago dumating ang reply.)
Ok lang, kaw?
(Mga ilang minuto ding sumubok mag-reply. Ngunit bago niya matapos ang kanyang mensahe, may dumating ng text mula kay Makiling.)
,muzta n lovelife? my new gf k n?
meron n,
ganun, preho pla tau. sna maging masaya k s piling niya.
ganun din aq, sna magng msya k dn s bgu mong bf.
Iba ang pakiramdam ng kanilang paghihiwalay ng landas. Walang hinanakit. Walang sama ng loob. Walang galit. Ang naging desisyon nilang dalawa ay pawang pagpaparaya sa kanilang mga puso may tibok na nakalaan para sa iba.
Nang gabi ding iyon ng Marso bente-singko, naitaktak na ang kanyang karanasan sa bagong pag-ibig. Ang butas sa kanyang dila ang tatak ng isang nasaktan at nagparaya.
Bago pa man tuluyang nawala sa hangin ang mga sumunod na text messages mula sa isa't-isa, naisantabi na ni Makisig ang larawan nilang dalawa nang huling gabing makausap niya ang kanyang dyosa.
No comments:
Post a Comment