Ansod

Daeng anghot ako puon pa kaidto
bakong arog kan napaparung ko sa sakung pinsan
na garu baga sangaw kan samung tangkal
na pirang bulan ng dae nabagunas
puon kan pinabakal si samung anayon
kan kinasal si matua kong tugang.

Kaya dae ko kinahiligan an deodorant
o garu burubaybay na tawas na nilalahid sa kili-kili.
Tama na an limonsito asin atom na karigus.

Sa pagtambay ko sa harung kan sakung kaklase,
mayhambog niyang pinihiling saku an saeyang nabakal
na deodorant na nadadalan
mi lang sa tv.

Nadara man kan kahambugan
an utak kan sakung kaklase,
paggamit mo daa kan arog kaitong mahalon na produkto,
ika mabaguntao.

Mama-magnet an mga kadaragahan
o kun bako man, magigin tsokolate an saimong lawas
kakulay kan nalalapang batag
na pipistahan kan mga bangaw.

Kaya kan nagsultero, nagpuon-puon naman
parungon an kili-kili tibaad ang dating panos
na nagigin anghot
ngunyan ansod na.

Pero mala ni, magradwar na lamang kami
siya na perang taon ng
kagagamit kan saeyang deodorant,
mayong pagbabago
ni sarung bangaw mayu sakong maipabisto.

Sa sarung meeting de avance,
na an tugang ko saru sa mga kandidato
daeng parung an sakung nasinghot,
garu gabos naggamit nin deodorant
dae lang mamarung sa atubang kan gabos.

Sa katahawi kan programa
na gabos nag-uurupak sa bagong proyekto ni kapitan,
garu ako nakaparung nin dae ko maipaliwanag
kung ito mabata o mahamot.

Biniklad an sapatos tibaad nakatungtong lang udo,
kunwaring kinagaw an kili-kili
dangan pahikap na pinarung an sarung muro.
Sabay ngururot kan dungo.

Tias! Dae naiuli
ni kuya si deodorant
matapos niyang masubli.