Tungay

Kinatudan ko ng magbasa
kan Guinness World of Record,
sa laog kan saeyang klase,
eto bagang
mga kakaibang pasanto
kan mga ordinaryo
man lang na tawo.

Egwang lalaking
sa hawak dakul nin tattoo;
babaeng may pinakahalabang kuko
sa bitis asin muro;
lalaking pirang oras
na nagbitay nin suwi,
o etong babaeng naghahamil
nin mga turnilyo asin susi.

Pero ako,
hanggang digdi na lang,
hanggang matunaw
sa saemung atubangan.
Dikit na sanang aldaw,
ipepresentar ko naman saemu,
an tropeyong magigin ladawan
kan saimung kahigusan sa pagtukdo,
hali sa mga tungay
na sakuyang inipon asin hinulma
sa irarom kan sakuyang
kinamumugtakan
mantang dinadangog
kan saemung leksyon
dae lang tungkaon.